រតនគិរី៖ប្រជាពលរដ្ឋរស់នៅតំបន់ក្បែរច្រករបៀងខ្លាធំ ឃុំប៉ក់ញ៉ៃស្រុកអូរយ៉ាដាវខេត្តរតនគិរីបានខ្សឹបថា ក្រុមឈ្មួញបានធ្វើសកម្មភាពដឹកជញ្ជូនបារីនិងទំនិញរត់ពន្ធចេញទៅប្រទេសវៀតណាមតាមច្រករបៀងខ្លាធំ យ៉ាងរលូនខណៈមានការឃុបឃិតគ្នាជាប្រព័ន្ធ។ប្រភពដដែលខ្សឹបទៀតថាការដែលឈ្មួញអាចដឹកជញ្ជូនបារី ក៏ដូចជាទំនិញរត់ពន្ធផ្សេងៗចេញទៅប្រទេសវៀតណាមតាមច្រករបៀងខ្លាធំគឺកើតឡើងស្ទើរជារៀងរាល់យប់ដោយការឃុបឃិតបើកដៃពីមន្ត្រីជំនាញនិងសមត្ថកិច្ចពាក់ព័ន្ធជាច្រើនស្ថាប័ន។មន្ត្រីអាជ្ញាធរនិងសមត្ថកិច្ចមូលដ្ឋានឃុំប៉ក់ញ៉ៃ បានខ្សឹបឲ្យដឹងទៀតថាទាល់តែមានការឃុបឃិតពីសំណាក់មន្ត្រីគយនគរបាលប្រឆាំងបទល្មើសសេដ្ឋកិច្ច ក៏ដូចជានគរបាលការពារព្រំដែននិងយោធាការពារព្រំដែនទើបឈ្មួញអាចដឹកជញ្ជូនទំនិញរត់ពន្ធចេញទៅស្រុកវៀតណាមយ៉ាងពេញបន្ទុក។ទោះបីជាយ៉ាងណាក៏ដោយប្រភពពីសមត្ថកិច្ចពាក់ព័ន្ធតូចតាចក្នុងខេត្តរតនគិរីអំពាវនាវឲ្យលោកថងសាវុនអភិបាលខេត្តរតនគិរីក៏ដូចជាលោក គុណ ញឹមអគ្គនាយកនៃអគ្គនាយកដ្ឋានគយនិងរដ្ឋាករកម្ពុជា ចាត់វិធានការទៅលើសកម្មភាពអំពើពុករលួយរបស់មន្ត្រីគយក្នុងខេត្តរតនគិរីជាបន្ទាន់ដើម្បីកុំឲ្យពួកគេឃុបឃិតបើកដៃឲ្យឈ្មួញដឹកជញ្ជូនបារី ទំនិញរត់ពន្ធនិងទំនិញខុសច្បាប់ចេញទៅស្រុកយួនតាមច្រករបៀងខ្លាធំតាមអំពើចិត្តទៀត។ ប្រភពបានខ្សឹបបន្ថែមថាមេគយខេត្តរតនគិរីក៏ដូចជាក្រុមគយចល័តក្នុងខេត្តរតនគិរី គិតតែពីរឿងប្រមូលលុយចែកគ្នាធ្វើមានធ្វើបានយ៉ាងសុខស្រួលហើយបណ្តោយឲ្យឈ្មួញនាំចេញទំនិញរត់ពន្ធទៅស្រុកយួនតាមច្រករបៀងខ្លាធំយ៉ាងគគ្រឹគគគ្រេង។ជាពិសេសសមត្ថកិច្ចនគរបាលការពារព្រំដែននិងមន្ត្រីយោធាការពារព្រំដែនជាអ្នកបើកផ្លូវសម្រួលឲ្យឈ្មួញដឹកជញ្ជូនទំនិញរត់ពន្ធទៅស្រុកយួនដើម្បីផលប្រយោជន៍ផ្ទាល់ខ្លួន។បើតាមពីសមត្ថកិច្ចមូលដ្ឋានក្នុងឃុំប៉ក់ញ៉ៃស្រុកអូរយ៉ាដាវបានខ្សឹបថាករណីឈ្មួញដឹកជញ្ជូនបារីទំនិញរត់ពន្ធ ទំនិញខុសច្បាប់ចេញទៅស្រុកយួនតាមច្រករបៀងខ្លាធំកើតឡើងច្រើនឆ្នាំណាស់មកហើយតែមិនដែលមានការទប់ស្កាត់ពីមន្ត្រីជំនាញឬសមត្ថកិច្ចពាក់ព័ន្ធនោះទេ៕រ៉ាមន
